蒲鋒曾經在無綫當了十幾年資料搜集員，對電視及電影相當熱愛，亦出過《群芳譜》、《江湖路冷》等書籍，介紹香港電影女明星及黑幫電影。TVB劇集很多時被網民發現很多bug位，製作團隊好像「事事旦旦」，但其實有個部門一點也不事旦，非常認真，只不過無人重視。如果有留意劇集最後的字幕，即Roller，應該會發現其中一欄寫上「資料搜集」，這個部門位於無綫製作大樓7樓，只得幾個人，但要負責全公司劇集資料搜集工作。前無綫劇集資料搜集員蒲鋒，亦做過香港電影資料館研究主任，當年為不少劇集做過資料搜集，他接受《香港01》訪問，細問之下，資料搜集員工作猶如醫生，解決編劇不少「奇難雜症」的問題，好似「食Panadol自殺會點死？」、「清朝買隻馬幾多錢？」、「明朝有冇消防隊？」、「點解警察盤問室張枱係三角形？」問題比《千奇百趣》更奇更趣，少一點求知慾都應付不到。
醫生題材劇集在無綫經常出現，除了有專業醫生做顧問，資料搜集員亦要不斷更新醫療知識。（網上圖片）資料搜集有底線 唔好教壞人
蒲鋒原先想做編劇，但最後經林超榮介紹入了資料搜集組，每天就是等編劇來問問題，其中有次編劇突然走入來問：「食Panadol自殺會點死？」接到問題資料搜集員就要開工，他說：「忘記了是哪套劇集，最後有冇用都不知道，但我想講千祈不要用Panadol自殺，因為好恐怖，Panadol是會令你好清醒咁死。有時自殺只不過想人關心下，或者發洩下，你去到醫院以為自己冇事，你好精神，但其實你離死亡已經好近，清醒咁死係一件好恐怖嘅事。」
美劇CSI出名真實，更啟發TVB拍了不少法證系列，但當年亦被投訴過份真實，會令壞人愈來愈醒目。（網上圖片）那究竟食幾多粒才會有危險？蒲鋒沒有答編劇，因為他怕出了街，會影響到人，那亦是資料搜集員的掙扎，他說：「有時太Detail好似會教壞人，但唔detail又好似缺乏真實感，好似美劇《CSI》出名真實，當年亦被人投訴過，它有劇情講怎樣破壞現場DNA方法，方法好簡單，就係用漂白水抺過你可能掂過的地方，有些人就批評這套劇教精咗啲壞人，但其實這些知識就算沒有這套劇都會知。」
雖然蒲鋒解答到清朝買隻馬幾錢，但近年TVB連租馬錢都慳返，《回到三國》關羽、張飛行住去打仗。（網上圖片）編劇放下一個看似好簡單問題，但資料搜集員為了找到答案，有時不單止要翻箱倒籠，甚至要摷到天腳底才找到答案，蒲鋒說：「有個編劇埋嚟問『清朝買一隻馬幾多錢？』這個問題好合理喎，古裝好多時見到主角騎馬，咁買隻馬畀幾多銀呢？睇落好簡單，究竟是幾錢？幾兩？幾百兩？差好遠㗎喎，其實好難搵喎，摷《中國物價史》這本書只是講米價，最後我終於搵到一本由日本人在晚清時候寫的《清末北京志資料》。這本書好正呀，但現在不是好多人識用，中國人不會detail講緊呢啲嘢，日本人天性資料搜集狂，這本書將當時整個北京生活指南，寫得非常詳細。TVB沒有這本書㗎，但資料搜集員有大學圖書館的借書證，Google都未必搵到清朝一隻馬幾多錢，我都好肯定。」
Google是不是萬能？有什麼是Google找不到？《警訊》係資料搜集員必睇節目？請留意蒲鋒訪問part 2。
【Roller 系列】最強資料搜集員 蒲鋒唔靠Google：搵到都係表面少林足球二師兄係李寧師弟 試鏡喪做湯馬斯迴旋：星爺點下頭就走【專訪】扮黎明得自信 楊尚斌捱足17年︰每日靠讀報紙克服黐脷筋【全職沒女】20歲當華仔MV女主角 姚瑩瑩：華仔叫我肥妹!